सोमेश्वरनगर | प्रतिनिधि
बारामती तालुक्यातील वाघळवाडी (सावंत वस्ती) येथे वडगाव निंबाळकर पोलिसांनी धाड टाकून गावठी हातभट्टी दारू तयार करणारा अड्डा उध्वस्त केला. या कारवाईत पोलिसांनी सुमारे ६४ हजार ४०० रुपयांचा मुद्देमाल जप्त केला असून तिघा आरोपींवर गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी विजय सुभाष नवले, अनिल रूपसिंग नवले व शैलेश शंकर नवले (सर्व रा. सावंतवस्ती वाघळवाडी, ता. बारामती) हे आपल्या घराशेजारील पडीक जागेत गावठी दारू तयार करत होते. सोमवारी (दि. ८ सप्टेंबर) रात्री साडेआठच्या सुमारास पोलिसांना मिळालेल्या माहितीच्या आधारे कारवाई करण्यात आली. त्या वेळी आरोपी बॅरलमध्ये ठेवलेले कच्चे रसायन तापवून हातभट्टीची दारू तयार करत होते. पोलिसांचा पथक घटनास्थळी पोहोचताच आरोपी अंधाराचा फायदा घेत पळून गेले.
कारवाईदरम्यान पोलिसांनी घटनास्थळी पाच लोखंडी बॅरलमध्ये १००० लिटर कच्चे रसायन, सात रिकामे बॅरल आणि इतर साहित्य असा एकूण ६४ हजार ४०० रुपयांचा मुद्देमाल जप्त केला.
या प्रकरणी पोलीस शिपाई नागनाथ परगे यांनी फिर्याद दिली असून मुंबई प्रोव्हीजन कायदा कलम अन्वये गुन्हा दाखल करण्यात आला आहे. पुढील तपास पो. हवालदार नागटिळक करत आहेत.
0 Comments